Parveen Shakir ki Buht hi Shandar Ghazal.

Kamaal-e-zabt ko Khud bhii to aazmaungi
mai.n apane haath se us kii dulhan sajaungi.

Supurd kar ke use chandni ke haathon
main apane ghar ke andheron ko laut aaungi.

Badan ki karb ko vo bhii samajh na paayegaa
main dil me.n roungi aankhon men muskuraungi.

Woh kyaa gayaa ke rafaaqat ke saare lutf gaye
main kis se ruuth sakungi kise manaaungi.

Woh ik rishtaa-e-benaam bhii nahin lekin
main ab bhii us ke ishaaron pe sar jhukaaungi.

Bichhaa diyaa thaa gulaabon ke saath apanaa vajuud
vo so ke uThe to Khvaabon kii raakh uThaungi.

Ab us kaa fan to kisii aur se manasuub huaa
main kis kii nazm akele men gun_gunaungi

Javaz Dhoondh rahaa thaa naee muhabbat kaa
vo kah rahaa thaa ke main us ko bhuul jaaungi.

Sama'aton men ghane jangalon kii saansen hain
main ab kabhii terii aavaaz sun na paa_uu.ngi.